RATIBA ZA MIKUTANO YA KAMPENI YAJADILIWA NA VYAMA VYA SIASA WILAYANI KONGWA

Imewekwa: November 16th, 2024

Kikao cha viongozi wa vyama vya siasa kimefanyika katika ofisi za msimamizi wa uchaguzi wa Wilaya ya Kongwa Ili kujadili ratiba za mikutano ya kampeni.

Kikao hicho muhimu kimefanyika wakati zoezi la uchaguzi wa wagombea umekamilika na hivyo kufanya zoezi linalofuata la mikutano ya kampeni kufanyika kuanzia tarehe 20 mwezi Novemba mpaka tarehe 26 Novemba 2024.

Ikumbukwe kuwa mikutano ya kampeni itafanyika kwa siku sita na kufanya zoezi hilo kumalizika siku moja kabla ya uchaguzi ambapo zoezi hilo litafikia tamati ili kutoa fursa kwa wananchi kushiriki katika zoezi la uchaguzi wa serikali za mitaa tarehe 27 Novemba kuchagua viongozi watakaowaletea maendeleo katika maeneo yao.

Viongozi watakaopigiwa kampeni na kujinadi katika mikutano hiyo ni Pamoja na viongozi wanaogombea nafasi ya Mwenyekiti wa Kijiji, Mwenyekiti wa Kitongoji, Wajumbe wa Halmashauri ya Kijiji kundi mchanganyiko la wanaume na wanawake Pamoja na nafasi za wajumbe wa Halmashauri ya Kijiji kundi maalumu la wanawake.

Kama jinsi kauli mbiu isemavyo, “Serikali za Mitaa, sauti ya Wananchi, tujitokeze kushiriki uchaguzi wa Serikali za Mitaa.” Ni wajibu wa kila Mwananchi kushiriki kikamilifu katika zoezi la uchaguzi wa Serikali za Mitaa.