Diwani Mpya Viti Maalum aapishwa

Imewekwa: November 24th, 2022

Hakimu Mkazi Mwandamizi wa Wilaya ya Kongwa Mhe. Koku John Mwanemile amemuapisha Diwani wa Viti Maalum wa Tarafa ya Zoissa Mhe. Zainabu Abdi Mabrouck leo Novemba 24, 2022.

Tukio hilo la uapisho limefanyika katika ukumbi wa Elimu, Halmashauri ya Wilaya ya Kongwa wakati wa kikao cha kawaida cha kamati ya Fedha, Uongozi na Mipango na kushuhudiwa na wajumbe wa kikao hicho wakiwemo Spika mstaafu wa Bunge la Jamhuri ya Muungano wa Tanzania na Mbunge wa Jimbo la Kongwa Mhe. Job Yustino Ndugai na Viongozi wakuu wa Halmashauri.

Mhe. Mabrouck ameapishwa kushika wadhifa huo Ili kujaza nafasi iliyoachwa wazi na aliyekuwa Diwani viti maalum wa Tarafa ya Zoissa, Marehemu Sarah Lujeli aliyefariki Dunia Tarehe 2 Agosti, 2021.

Akizungumza nje ya ukumbi huo Diwani viti maalumu Mhe. Monica Nyabu amepongeza hatua ya Mhe. Mabrouck kuapishwa na kuungana na madiwani wenzake na kwamba kutokana na uchapakazi wake ataisaidia Halmashauri kuyafikia malengo yake.

Naye Makamu Mwenyekiti wa Halmashauri ya Wilaya ya Kongwa Mhe. Richard Mwite, licha ya kupongeza hatua ya kuapishwa kwake Zainabu Mabrouck pia ameelezea mchakato mzima uliofanyika hadi kufikia hatua ya uapisho.