Watumishi Kongwa waaswa kudumisha Nidhamu na maadili ya kazi

Imewekwa: October 23rd, 2023

Mwenyekiti wa Halmashauri ya Wilaya ya Kongwa Mhe. White Zuberi Mwanzalila amewataka Watumishi kufanya kazi kwa Uaminifu, Nidhamu na ushirikiano mkubwa Ili Halmashauri izidi kupiga hatua katika nyanja za mbalimbali za Maendeleo.

Mhe. Mwanzalila alisema hayo wakati akifunga kikao Cha Kamati ya Fedha, Uongozi na Mipango kilichofanyika Oktoba 23, 2023 katika ukumbi wa Elimu uliopo Halmashauri.

Aliongeza kuwa kupitia ushirikiano wa Watumishi, Wilaya Imekuwa ikifanya vizuri katika usimamizi na utekelezaji wa Miradi mbalimbali.

Aidha kupitia Fedha TZS. 544,225,625 zilizotolewa na Serikali kupitia mradi wa SEQUIP Kwa mwaka 2023, Wilaya ya Kongwa imeweza kujenga Miundombinu ya Shule Mpya ya Sekondari katika Kijiji Cha  Manungu ambapo kwa Mujibu wa Taarifa ya Ukaguzi wa Miradi iliyowasilishwa kwenye kikao hicho, jumla ya vyumba nane (8) vya madarasa vimejengwa, Majengo ya Utawala na TEHAMA yamekamilika huku Majengo ya Maktaba, Matundu ya vyoo,  vyumba vitatu (3) vya Maabara navyo vikiwa katika hatua ya umaliziaji.

Akiwasilisha taarifa ya Mapato na Matumizi, Mkuu wa Kitengo Cha Fedha CPA. Deodatus Mutalemwa alisema, kwa robo ya kwanza ya mwaka wa fedha 2023/2024 iliyoishia Septemba 30, Halmashauri ilipokea jumla ya shilingi 9,828,349,059.72 kati ya makisio ya shilingi 11,038,201,750 ambayo ni sawa na asilimia 89% ya makisio ya robo ya kwanza.

Mutalemwa alifafanua kuwa kati ya fedha hizo, jumla ya shilingi 1,226,180,588.63 sawa na 102.9%ya lengo la shilingi 1,192,149,250 kwa robo ya kwanza zilitokana na vyanzo vya ndani vya Halmashauri na shilingi 6,755,540,650.00 sawa na 108.2% ya lengo la shilingi 6,245,871,000.0 zikiwa ni ruzuku toka Serikali kuu kwa ajili ya kulipia Mishahara. Aliongeza kuwa kwa upande wa matumizi ya kawaida (OC) Halmashauri ilipokea kiasi cha fedha shilingi 966,364,107.88 ambayo ni sawa na 305.1% ya makisio yenye kiasi cha shilingi 316,692,250 kwa robo,  jambo ambalo  kamati ya Fedha, uongozi na Mipango ilipongeza.

Kikao hicho pia kilipokea taarifa mbalimbali kutoka kwenye Divisheni na vitengo vya Halmashauri ambavyo ni Kitengo cha Mawasiliano Serikalini, Usimamizi wa Ununuzi, TEHAMA na Takwimu, Huduma za Sheria, Divisheni ya Utawala na Usimamizi wa Rasilimali Watu, na Taarifa za Mikutano ya Mabaraza ya Mamlaka za Miji Midogo ya Kongwa na Kibaigwa.