Waziri Jenista Mhagama Awahasa Vijana Kutunza Mazingira

Imewekwa: August 11th, 2017

Katika kuelekea kilele cha Siku ya Kimataifa ya Vijana Agosti 12, Waziri wa Sera, Masuala ya Bunge, Kazi, Ajira, Vijana na Wasiojiweza Mhe  Jenista Joakim Mhagama amewahasa vijana kutunza mazingira kwani ni faida kwa kizazi cha sasa na kijacho.  Pia, alieleza kuwa kuharibu mazingira ni kukaribisha majanga kama vile ukame, njaa, vifo vya mifugo na mengine mengi.

Amesema haya alipokuwa katika uzinduzi wa maadhimisho ya Siku ya Vijana Kimataifa yaliyofanyika Wilayani Kongwa katika Viwanja vya Shule ya Sekondari Ibwaga, ambapo zoezi la upandaji miti limefanyika na jumla ya miti hamsini (50) imepandwa ili kulinda mazingira ya shule hiyo na wadau mbalimbali wa mazingira wilayani Kongwa wameshiriki kupanda miti hiyo kwa waliohudhuria tukio hili.

Aidha, Mheshimiwa Waziri amesikitika kuona jinsi mlima wa Ibwaga ulivyoharibiwa kutokana na shughuli za kibinadamu ambapo amesema “mlima unalalamika, umevuliwa nguo, umedhalilishwa” na kuagiza kwamba mlima huo utunzwe kwa kupandwa miti na kuundwa kwa kikundi  maalum cha mazingira ili kukabiliana na uharibifu wa huo wa mazingira.

Kilele cha Maadhimisho ya Siku ya Kimataifa ya Vijana Agosti 12, kitaifa yatafanyika katika viwanja vya “Nyerere Square” Manispaa ya Dodoma.