Barabara ya Kongwa – Mbande Kujengwa Kiwango cha Lami

Imewekwa: May 25th, 2017

Kilio cha siku nyingi kwa wakazi wa wilaya ya Kongwa kuomba barabara ya kutoka Kongwa kwenda Mbande kujengwa kiwango cha lami sasa kimesikika kwani ujenzi wa barabara hiyo kwa kiwango cha lami umeshaanza.

Kwa sasa mkandarasi ameshaanza kukusanya vifaa na tayari baadhi vimeshafika eneo la mradi. Katika utekelezaji wa mradi huu, jumla kilometa 11 zitajengwa kutoka barabara kuu (Dodoma – Dar es salaam) hadi sehemu ya mizunguko (round about) ya Kongwa. Barabara inatarajiwa kukamilika baada ya miezi tisa (9) kwa mujibu wa mkataba.

Aidha, kukamilika kwa ujenzi wa barabara hii kutafungua fursa nyingi kwa wakazi wa Kongwa kwani maandalizi ya upimaji wa viwanja kwa maeneo ya Mbande yamekamilika pia ili kuufanya mji huo kuwa wa kisasa.