Baraza la Biashara Lajadili Masuala Yanayokwaza Uwekezaji na Ukuaji wa Biashara Wilayani Kongwa

Imewekwa: September 17th, 2018

Baraza la Biashara la Wilaya ya Kongwa limefanya kikao maalum kuhusu kuweka mazingira bora na rafiki ya kukuza biashara zilizopo pamoja na kuibua biashara mpya wilayani humo.

Mchokoza mada kutoka shirika la uboreshaji wa Mazingira ya Biashara ya Ndani (Local Investment Climate - LIC) Ndugu Donald Liya ameeleza kwamba baada ya Serikali kuhamishia Makao Makuu yake katika Jiji la Dodoma, Mkoa wa Dodoma umekuwa na fursa nyingi za uwekezaji na wadau wengi wamekuwa wakifika katika Ofisi ya LIC Jijini Dodoma kutafuta fursa za uwekezaji.  Hivyo, kama Halmashauri ya Wilaya ya Kongwa haijajiandaa vema itapoteza fursa hii ya Dodoma kuwa Makao makuu ya nchi.

 Aidha, amefafanua sehemu zenye mapungufu katika Halmashauri ya Kongwa kuhusiana na masuala ya uendelezaji na uibuaji wa biashara kwa mujibu wa tafiti ndogo iliyofanyiwa na LIC, ambapo amezitaja changamoto hizo ni; huduma kwa wateja (wafanyabiashara au wawekezaji) ikiwemo utoaji wa taarifa sahihi kwa wakati; upatikanaji wa umeme wa uhakika; upatikanaji usioridhisha wa huduma za maji kwa ajili ya matumizi mbalimbali; upatikanaji wa ardhi iliyopimwa kwa ajili ya uwekezaji na biashara;  kukosekana kwa taasisi muhimu zinazochochea biashara na uwekezaji kama vyuo, taasisi za fedha (banks), shule nzuri binafsi, kampuni za afya, maeneo ya michezo na burudani,  n.k.; utitiri wa tozo kwa biashara – tozo ngazi ya Halmashauri na Serikali Kuu; miundombinu duni hasa kutoka maeneo ya uzalishaji.

Baada ya mchokoza mada kuwasilisha mada, Wajumbe walijadili changamoto zilizobainshwa na kisha kufikia maazimio yafuatayo;

1. Kila Taasisi za Umma itoe elimu kwa watumishi wake juu ya huduma kwa wateja;
2. Viongozi wasimamie wataalam na wafanyabiashara kuhakikisha wanatoa huduma nzuri kwa wateja;
3. Huduma kwa Wateja iwe agenda ya kudumu na kuwekewa mikakati;
4. Kila Ofisi iweke bango litakaloonesha mawasiliano ya Mkuu wa Taasisi kusaidia wateja waliopata huduma isiyo rafiki;
5. Wizara ya Elimu iingize Huduma kwa Mteja kuwa sehemu ya mtaala wa elimu;
6. Ofisi ya Mkuu wa Wilaya iunde timu itayounganisha taasisi wezeshi kutatua changamoto mbalimbali katika maeneo ya kimkakati – upimaji wa viwanja na uwekaji wa miundombinu wezeshi kuvutia uendelezaji wa viwanja katika maeneo hayo;
7. Ofisi ya Mkuu wa Wilaya iunde Kamati itakayoonesha na kuongoza njia ya uwekezaji. Aidha, Kamati hiyo iainishe vipaombele vya uwekezaji ndani ya Wilaya;
8. Shirika la Umeme Tanzania (TANESCO) ifupishe muda wa ufungaji wa umeme kwa wateja;
9. Gharama ya Umiliki ardhi kwa mwekezaji iwe rafiki ili kumvutia awekeze; aidha, Halmashauri ifanye huduma na siyo ifanye biashara;
10. Ushirikishaji kwa wafanyabiashara ufanyike wakati Halmashauri inapopanga tozo;
11. Ofisi ya mkuu wa wilaya iunde timu ndogo ambayo itatathimini na kuainisha tozo ziwe rafiki na kulipa;
12. Halmashauri kufuatilia na kutoa msukumo kwa Taasisi ambazo zimeonesha nia ya kuwekeza ndani ya Wilaya mfano VETA na Wizara ya Maji katika ujenzi wa vyuo;
13. Halmashauri iandae timu itakayokuwa ikiandika maandiko ya miradi ya kimkakati ndani ya wilaya;
14. TARURA Wilaya ya Kongwa iweke kanzidata ya Wilaya kwenye miundombinu na kuweka vipaombele;
15. Elimu ya uanzishaji wa biashara itolewe kwa wote kati ya Mamlaka ya Mapato (TRA) na  Ofisi ya Biashara ya Wilaya;
16. TRA, Ofisi ya Afya, Ofisi ya Biashara zishirikiane kwa pamoja kuunda Jarida/Kipeperushi kitakachoonesha mwongozo wa uanzishaji wa biashara.

Kikao hiki cha Baraza la Biashara la Wilaya maalum kimefanyika Septemba 12, 2018 ambapo mbali na wajumbe wake limehudhuriwa na wageni walikuwa wakiwemo Wakuu wa Taasisi mbalimbali Wilayani Kongwa, Waheshimiwa Madiwani – Wakuu wa Kamati za Kudumu, na wageni toka Mkoani.