Kongwa Mjini Kupata Maji ya Uhakika

Imewekwa: April 25th, 2018

Mamlaka ya Maji na Usafi wa Mazingira ya Mji Mdogo wa Kongwa inatekeleza mradi mkubwa wa maji ambao utanufaisha wakazi waapatao 29,039 ambayo ni sawa 90% ya wakazi waliopo Kata za Kongwa, Ugogoni, na sehemu ya Kata ya Sejeli.

Mhandisi wa Maji wa Wilaya ya Kongwa, Eng. Kaitaba Lugakingira akizungumza na Afisa TEHAMA (W), ameeleza kwamba hali halisi ya utoaji wa huduma ya maji kwa sasa ni asilimia 47.4 (47.4%) katka mji wa Kongwa, hivyo mradi huu utakuwa mwarobaini kwa changamoto za maji zilizokuwa zikiusumbua mji wa Kongwa.

Aidha, ameeleza kwamaba mradi huu unagharimu TSh. 1,549,168,228.17 (Shilingi bilioni moja milioni mia tano arobani na tisa mia moja sitini na nane elfu mia mbili ishirini na nane na senti kumi na saba) ikijumuisha 18% ya Kodi ya Ongezeko la thamani (18%VAT). 

Mradi unatekelezwa na Mkandarasi HEMATEC INVESTMENT LIMITED wa S.L.P 34078, DSM, ambaye ameshaanza kazi baada ya  kusaini mkataba tarehe 25/01/2018 na anatarajia kukamilisha mradi tarehe 08/09/2018.

Mradi unasimamiwa na Mhandisi wa Maji wa Wilaya Kongwa na Mkandarasi amepangiwa kufanya kazi zifuatazo;

• Ujenzi wa Nyumba 2 za Pampu;
• Ufungaji wa Pampu 3 za kusukuma Maji;
• Ujenzi wa tenki la kukusanyia maji lenye ujazo wa lita 135,000;
• Ujenzi wa tenki la kupeleka maji kwa Wananchi lenye ujazo wa lita 1,000,000;
• Ujenzi wa bomba kuu za kupeleka maji kwenye matenki, na kwa jamii;
• Kupeleka huduma ya maji Shule ya Sekondari Ibwaga kwa kutumia Mfumo wa Jua (Solar system) kutoka kisimani;
• Kupeleka huduma ya Maji kwenye taasisi mpya za Jeshi la Wananchi Tanzania, VETA na Chuo cha Maji (Pamoja na eneo la Morisheni katika viwanja vipya vilivyopimwa).