Wajasiriamali kongwa waomba Mikopo ya Zana za Kilimo.

Imewekwa: February 7th, 2022

Wanufaika wa mikopo ya vikundi inayotolewa na Halmashauri kupitia Idara ya Maendeleo ya Jamii wilayani Kongwa, Wameiomba Serikali kuwakopesha Zana za Kilimo hasa Matrekta na Mashine za kuchakata Mafuta ya Alizeti ili waweze kujikwamua Kiuchumi.

Ombi hilo limetolewa na Wanakikundi wa  vikundi vya Tunaweza na Msembe kutoka kata ya Ngomai vinavyojishughulisha na kununua, kukamua na kuuza  mafuta ya Alizeti,  wakati wa ziara ya Maafisa Maendeleo ya jamii  wilaya inayoendelea kwa lengo la kukagua Miradi ya vikundi vilivyopewa Mikopo hiyo.

Mwenyekiti wa Kikundi cha Tunaweza Bibi Perisi Mazengo, ameeleza kuwa mikopo hiyo licha ya kuwasaidia kuondokana na riba kubwa walizokuwa wakitozwa na matajiri, pia imewasaidia kusomesha watoto wao.

Afisa Mikopo Idara ya Maendeleo ya Jamii wilayani Kongwa Bwana Joseph Mshana, Amewasisitiza wanakikundi wa vikundi hivyo  kuzingatia kanuni na taratibu za biashara ya Mafuta ya Alizeti ikiwa ni pamoja na kushirikisha wataalamu wa afya na pia Uwekaji wa lebo katika bidhaa zao ili kuongeza tija ya Mikopo hiyo.

Naye afisa Maendeleo, Bwana Alen Msumule, ameongeza kuwa, umefika wakati ambapo vikundi havitatakiwa kuzidi watu kumi ili mikopo hiyo iweze kuwanufaisha.